La Felguera 18 d'ochobre de 2012
Xuntada la Xunta Directiva de la Sociedá, nel día del encabezamientu, y dempués d'haber analizado diverses candidatures, toma por unanimidá el alcuerdu de conceder a la BANDA DE MÚSICA DE LLANGRÉU, la condecoración de la «Pota d'Oru» de 2012 debíu a los motivos que se resumen a continuación:
ENTAMOS DE LA BANDA DE MÚSICA DE LLANGRÉU Anque oficialmente se da la fecha d'Ochobre de 1900 como la que verdaderamente inicia la creación de la Banda de Música de Llangréu, debemos recordar que en Llangréu, y anterior a esta fecha, esistieron otres formaciones musicales tamién denominaes «Bandes», que ofrecieron al públicu llangreanu actuaciones en fiestos y actos relixosos. Ye conocío que en Ciañu esistía nel añu 1880 una Banda de Música, dirixida polos maestros Mateo y Cirilo, que llegaron a recibir del Ayuntamientu Llangreanu subvenciones pal so mantenimientu. Igualmente en Turiellos (La Felguera), tamién había otra Banda que, en esti casu, recibía dineru de Duro Felguera, llamábase La Armonía, y nel añu 1898 dirixía D. Manuel García de la Llera. Al tiempu en Sama, y na conocida y inda esistente «Casa del Orfeón» (nome que recibía por ser onde ensayaba el Orfeón Llangreanu), había otra Banda más que, al igual que la de Ciañu, recibía dineru del Ayuntamientu pal so mantenimientu; esta Banda contaba con más apoyu, al ser el so director D. Mario Nuevo, que yera'l secretariu del Ayuntamientu.
L'alcalde Llangreanu D. Antonio Dorado, home de grandes inquietudes culturales, decide crear una Banda de Música que seya la que represente oficialmente al Conceyu. Tres varios plenos nel Ayuntamientu, decide'l Consistoriu buscar un director que organice la vida musical de Llangréu. El secretariu del Ayuntamientu D. Agustín Nicolau (D. Mario Nuevo, anterior secretariu y director de la Banda, taba n'otru destinu) entama'l contactu con D. Cipriano Pedrosa, director de la Banda de Música de la Fábrica de Cañones de Trubia. Sigue'l contactu por cartes ente'l Sr. Pedrosa y l'alcalde Dorado, y en Ochobre del añu 1900, D. Cipriano Pedrosa Solares faise cargo de la Banda de Música de Llangréu.
BANDA DE MÚSICA DE LLANGRÉU, BREVE HISTORIA Con estes dos pallabres que lo dicen tolo, trataré de contar a les persones que vais a lleer esti artículu la historia de la Banda de Música de Llangréu: la Banda que todos conocemos, la que acompaña los nuestros recuerdos, la que siendo neños encandilaba'l nuesu ánimu y corremos tres d'ella llenos de felicidá cuando desfilaba poles calles interpretando airusos pasacalles; esa Banda que a todos nos pertenez, que yá taba ehí cuando nacimos, y que cuenta na actualidá con ciento doce años d'edá. Por eso sería imposible y al tiempu volumionosu tratar de contar tantos años de vida d'esta institución; púsose a esti artículu'l nome de «Breve Historia», col únicu fin de recordar a too el mundu que la Banda de Música de Llangréu sigue ehí, y necesita del cariñu y el calor del pueblu como siempre tuvo, pa siguir deleytándonos durante munchos años más. Por eso, agora que se cumplen ciento doce años de vida de forma oficial (porque inda tien unos cuantos años más), ye bono y necesariu facer un breve repasu pola historia d'esta institución, tan querida y apreciada nel nuestru Valle de Llangréu. Tá escritu, y ye de todos conocío, que la creación d'una Banda de Música que representase oficialmente al Ayuntamientu de Llangréu fue idea y tamién responsabilidá de dos persones: D. Antonio María Dorado González —alcalde de Llangréu— y de D. Juan Álvarez Miranda —párroco de la Ilesia de San Eulogio— (güei Santiago apóstol). Corría'l añu 1900 cuando se contactó con D. Cipriano Pedrosa Solares, director entós de la Banda de Música de la Fábrica de Cañones de Trubia, pa que se ficiera cargo de la organización, preparación y dirección de la Banda que Llangréu pretendía crear. Nel mes d'Ochobre d'ese mesmu añu, llegó a Sama'l Sr. Pedrosa contrataú pol Ayuntamientu como director de la Banda, y al tiempu organista pa les funciones relixoses de la Ilesia de San Eulogio de Sama. Nun principiu fue un verdaderu «tira y afloxa» ente'l Sr. Pedrosa y l'Ayuntamientu; el director pretendía crear una Banda de Música dende'l primer momentu, pero debíu al altu costu económicu que ello representaba, l'Ayuntamientu optaba por ir faciendo les coses «poco a poco»; dempués de diverses xuntances y plenos municipales, díoselu un votu de confianza al Sr. Pedrosa, y dende ese momentu entamóse a reclutar a futuros músicos; había nacío la Banda de Música de Llangréu. Habilitóse un local pa crear la academia, onde s'irían formando musicalmente los alumnos. Los aspirantes a músicos procedían de la población llangreana, nun habiendo pa ello distinción de clases sociales, nin nada que limitase a cualquier persona'l pertenecer a la recién formada agrupación musical. El local asignáu taba situáu nel baxu d'un edificiu na actual calle Constitución, yera una casa d'un solu pisu; lindaba como vecinos a mano izquierda cola fundición de «Manolín el de Rogelia», más tarde tuviéron ehí los talleres Renault, y actualmente ta'l solar sin edificar. Y pola mano derecha, con un solar que durante munchos años fue chatarreríe, y que a la entrada d'ella (nun sé el por qué) fue llugar habitual pa la instalación de «churreríes». Nel centru d'esti vecindario taba la «academia de música»; el edificiu inda esistie, en ese baxu comercial agora ta la floristería Arco Iris, y anteriormente fue'l taller eléctrico de Pedro Fernández. Dura xera tuvo'l Sr. Pedrosa pa preparar la Banda de Música, con persones que la mayoría carecíen de formación musical, pero gracies al tesón del director y a la afición de los educandos, llogróse lo pretendíu… crear una Banda de Música pa Llangréu. Nun hai datos que nos revelen cuándo fue presentada en públicu, pero sabiendo de la capacidá del director Sr. Pedrosa, nun creo que tardasen más d'un añu en facer la so primera aparición. Hai una fotografía de la Banda de Música nes escaleres de la Ilesia de Sama, que se les ve en ropa de calle, sin uniformar; probablemente seya d'unes de les primeres actuaciones. Nel añu 1906 —seis dende la so fundación— esta agrupación participa nun festival provincial de Bandes de Música, na Plaza de Toros de Xixón, en competencia coles d'Avilés, Noreña, Villaviciosa y Colunga, y obtién dos primeros premios, unu d'execución y otru d'honor. La obra obligada pal concursu fue Sansón y Dalila, del compositor Camille Saint-Saëns. Banda de Música de Llangréu 1906. Asimesmo, el Orfeón Llangreanu, dirixíu pol Sr. Pedrosa, participa tamién ese mesmu día nun concursu de coros celebráu nel Teatru Dindurra de Xixón (güei Teatru Jovellanos), llogrado'l segundu premiu; premiu inmerecíu según los diarios de la época, porque fueron merecedores del primeru. Ante tal acontecimientu, el pueblu llangreanu vibró d'emoción; l'Ayuntamientu imprimió unes «octavilles» invitando a los llangreanos a recibir a la Banda de Música y al Orfeón na estación del Ferrocarril de Llangréu de Sama, amás d'engalanar balcones pa tal recibimientu. La emoción fue tan grande que la xente nun esperó al trén en Sama, sinón que s'algamó a la estación de La Felguera, y obligaron cariñosamente a la Banda y al Orfeón a baxar del trén y siguir hasta Sama a pié, en mediu d'una manifestación masiva de públicu que vitoreaba a los compoñentes de les dos agrupaciones y al so director, hasta l'Ayuntamientu de Sama. Dempués de tantos avatares (casi siempres económicos), la Banda sigue ofreciendo al pueblu Llangreanu la meyor calidá musical, como lo vien demostrando dende «siempre», gracies a la vocación, afición, interés y voluntá de los músicos compoñentes d'ella, que demuestren día a día'l so tesón y dignidá, pa que la Banda de Música de Llangréu non solo nun desapaezan, sinón que siga manteniendo la categoría que a lo llargo d'estos últimos «CIENTO DOCE AÑOS» siempre tuvo. Munchos fueron los músicos que pasaron por esta formación musical a lo llargo de tantos años d'esistencia; dalgunes fueron «aves de pasu», otres por el contrario permanecieron toda una vida na Banda, como ye'l casu del fallecíu recentemente D. José María Costales («Chema»), que fue músicu n'activu y perteneció a la Banda en cuerpu y alma durante sesenta y cinco años (65). El 7 d'Avientu de 2007, el nuestru Ayuntamientu concede la Medalla d'Oru del Conceyu a la Banda de Música de Llangréu, en reconocimientu a los sos méritos numa tan llarga traxectoria musical. En Payares de 2008, de nuevo l'Ayuntamientu de Llangréu reconoz la llabor de la Banda, y en particular la de los sos compoñentes, condecorando col emblema (escudu) de Llangréu, en plata, a los músicos que llevaben más de veinticinco años n'esta formación; impúsose la insignia a seis músicos. Nun podemos olvidar y agradecer, en esti recorríu pola historia de la Banda, a tantos y tantos compoñentes d'ella que perteneciéron a esta Formación Musical y que pola edá yá nun tan ente nós. Tamién, anque nun fuera músicu, a Jesús Espina, el popular «Suso», que «vivió» la Banda durante tantos años acompañándola nos sos conciertos y desplazamientos. Finalizamos esti recorríu pola historia de la Banda de Música recordando a la Sociedá Fiestos del Carbayu, que tamién forma parte de la nosa historia, al habenos concedíu'l títulu de Llangreanu d'Honor a la Banda, reconociendo los méritos y la llabor desenvuelta, cuando nel añu 1990 cumplimos los «CIEN» años de vida musical.