Turismo Llangréu - Ayuntamientu de Llangréu
Un quioscu ye una construcción llixera formada por varies columnes o pilares que sostienen una cubierta. Pue tener abiertos los llaos, siendo entós equivalente a un pabellón, un templete o un baldaquino; o tenelos zarraos. A diferencia de les pérgoles, la cubierta o techu de los quioscos nun tien oquedaes.
La so función ye apurrir una relativa protección del sol y de la lluvia, y en dalgún casu servir d'espaciu escénicu pa dalgún tipu d'espectáculu al aire llibre, como'l casu de los nuesos, o bien apurrir un pequeñu espaciu d'almacenamientu y puestu de venta na vía pública de forma estable. L'emplazamientu habitual d'estes estructures son xardinos, places, grandes víes o bulevares; en xeneral en sitios públicos amplios, como'l casu de los nuesos parques.
El quioscu del parque Dolores Fernández Duro, popularmente conocíu como Parque Vieyu, fai del parque más emblemáticu de #LaFelguera un sitiu especial. Construyóse siguiendo un estilu nel que la piedra y la madera mécense colos nuevos materiales, como'l fierro y l'aceru: ye'l modernismu, movimientu mui popular a finales del S. XIX. Amás, ye'l quioscu más grande d'#Asturies, lo que remarca la importancia del sitiu y de la so industria.
El quioscu del parque Dorado de #Sama ye de planta poligonal, siguiendo la tendencia modernista tamién; cúbrese con bóveda y pequeñu remate cónicu nel centru, en pizarra escamosa ya interior d'armazón metálicu y madera. Na parte baxa un zócalu con escalinata. La decoración concéntrase especialmente na rexería de la baranda perimetral y na estructura que cuelga del aleru. Tien, amás, mui bona acústica.
#llangréu #asturies #turismoasturies #patrimoniu #cultura #descubrellangréu